அஸ்ஸாம் மேகாலயா பயணம்

ஆர். சேஷாத்ரிநாதன்

பதிவு எண் நான்கு 

நேற்றைய தொடர்ச்சி (காமாக்யா கோவில்)

 

கடல் மட்டத்திலிருந்து 700 அடி உயரத்தில் உள்ளது. இந்தக் கோவிலில் விலங்குகள் உயிர் பலி கொடுக்கப்படுகிறது. ஒவ்வொரு ஆண்டும் ஜூன் மாதம் தேவி மாதவிடாய் அடைவதாக நம்பப்படுகிறது. அந்த மூன்று தினங்களும் கோவிலை சுற்றி உள்ள குளங்கள் ஏரிகள் மற்றும் பிரம்மபுத்திரா நதி சிவப்பு நிறத்தில் காட்சியளிக்கும்.

 

 

சக்தி இல்லாமல் சிவமில்லை என்பதை உணர்த்துவது இந்த கோவில். தக்ஷன்  நடத்தும் யாகத்திற்கு தன் மகள் பார்வதியையும் மருமகன் சிவனையும் தக்ஷன்  அழைக்கவில்லை. அப்படி இருந்தும் பார்வதி தேவி, சிவன் சொல்லச் சொல்ல கேட்காமல் இந்த யாகத்தில் கலந்து கொள்ள சென்றார்.

 

 

அங்கு தட்சன் பார்வதி தேவியை அவமானப்படுத்தி விட்டார். அந்த அவமானம் தாங்காமல் பார்வதி தேவி அங்குள்ள யாக குண்டத்தில் விழுந்துவிட்டார். இதை கேள்விப்பட்டு கைலாயத்திலிருந்து சிவபெருமான் ஓடோடி வந்து தன் தேவியின் உடலை தூக்கிக்கொண்டு ருத்ரதாண்டவம் ஆடினார். அவரது கோபத்தை தணிப்பதற்காக சுதர்சன சக்கரம் மூலம் உடல் துண்டு துண்டாக வெட்டப்பட்டது. அதில் யோனி பகுதி விழுந்த இடமே இந்த காமாக்யா கோவில். தேவியின் 51 துண்டுகள் விழுந்த இடங்கள் 51 சக்தி பீடங்களாக கருதப்படுகிறது.

 

 

இந்த கோவிலுக்கு வயதுக்கு வராத பெண்கள் வந்து வழிபட்டால் அவர்களது கோரிக்கை நிறைவேற்றப்படுகிறது. மேலும் குழந்தை பாக்கியம் இல்லாதவர்கள், திருமணமாகாதவர்கள் இந்த கோவிலுக்கு வந்து வழிபாடு செய்வதன் மூலம் அவர்களது கோரிக்கை நிறைவேறுவதாக கூறப்படுகிறது. ஒவ்வொரு ஆண்டும் ஜூன் 21 முதல் மூன்று நாட்களுக்கு அம்பு பாச்சி மேளா சிறப்பாக கொண்டாடப்படுகிறது.

 

 

சக்தி தேவி ஜூன் மாதம் மாதவிடாய் ஆவதை குறிக்கும் வகையில் இந்த விழா மிகச் சிறப்பாக கொண்டாடப்படுகிறது. இங்கு டிசம்பர் மாதம் காமேஸ்வரன், காமேஸ்வரி திருமணம் வெகு சிறப்பாக நடைபெறும்.

 

 

ஜூன் மாதம் 21ஆம் தேதி கோவில் கருவறை மூடப்படுவதற்கு முன்பாக அந்த கருவறையில் ஒரு பெரிய வெள்ளை துணியை வைத்து விடுவார்கள். பின்னர் நடை சாத்தப்படும். அதன் பின்னர் மூன்று நாட்கள் கழித்து நடையை திறக்கும் போது வெள்ளை துணி முழுவதும் சிவப்பு நிறமாக மாறி இருக்கும்.

 

 

இந்த சிவப்பு நிற துணியை சிறிய சிறிய துண்டுகளாக வெட்டி வரக்கூடிய பக்தர்களுக்கு பிரசாதமாக வழங்குகிறார்கள். இந்த துணிக்கு அம்பு பூச்சி வஸ்திரம் என்று பெயர். மூன்று நாட்கள் கழித்து அன்னை புதுப்பிக்கப்படுவதாக ஐதீகம்.

 

 

இந்த சமயத்தில் கோவிலில் லட்சக்கணக்கான பக்தர்கள் கூடுவார்கள். இந்த காமாக்யா கோவில் மிகவும் சக்தி வாய்ந்த கோவில் என கருதப்படுகிறது. அங்கு தரிசனம் முடித்து விட்டு மேகாலயா மாநிலத்தின் தலைநகரான ஷில்லாங்கை அடைந்தோம்.................

 

 

 

தொடர்கிறேன்